ဒေါင်းကိုဦးကျော်သူ အငယ်စားလေးလို့ ပြောတဲ့အပေါ် ဦးကျော်သူရဲ့ အမြင်

တစ်ချိန်က ဇာတ်ကားကောင်းများစွာနဲ့ ကျရာဇာတ်ရုပ်ကို ပီပြင်စွာသရုပ်ဆောင်နိုင်ပြီး ပရိသတ်များစွာရဲ့ အားပေးမှုကို ရရှိခဲ့တဲ့ ပရဟိတမင်းသားကြီး ဦးကျော်သူကတော့ လက်ရှိအချိန်မှာ ဒေါင်းနဲ့ ဇာတ်ကားရိုက်ကူးမှုတွေ ဆက်နေပြီး ပရိသတ်တွေက ဦးကျော်သူငယ်ငယ်က အကြည့်တွေနဲ့ အခုဒေါင်းရဲ့ အကြည့်တွေက ဆင်တယ်လို့ ပြောကြတဲ့အပေါ်မှာ ဒေါင်းကဒေါင်းကျော်သူက ကျော်သူပါဆိုပြီး အင်တာဗျူးတစ်ခုမှ ဖြေဆိုသွားခဲ့ပါတယ်။

ဦးကျော်သူက “ဒေါင်းကတော့ ကျွန်တော်နဲ့ ပဌာန်းဆက်ပဲ ပြောရမလားမသိဘူး။ သူနဲ့တွေ့ထဲက သူ့ကိုလည်း သံယောဇဉ်ဖြစ်တယ်။ ပြီးတော့ ကိုယ့်သားလို ကိုယ့်တူလို အဲ့လိုဖြစ်တယ် ပြီးတော့ ကိုယ်လုပ်ချင်တဲ့ အနုပညာဖန်တီးမှုကို သူကလက်ခံတယ်။ သူလုပ်ချင်တဲ့ဟာကိုလည်း ကိုယ်နဲ့ စိတ်ချင်းတွေ့တယ်။ ကျွန်တော်လုပ်ချင်တဲ့ဟာကို သူကအကောင်းဆုံးဖြစ်အောင် ရိုက်ပေးတယ်။ နောက်ပြီးတော့ အချိန်လေးစားတယ်။ အနုပညာအပေါ်တကယ်ကို စိတ်ဝင်စားတယ်။ ကိုယ်ရိုက်တဲ့ကား ကိုယ့်အနုပညာကို တန်ဖိုးထားတယ်။ အဲ့အတွက် ကျွန်တော်ချစ်တယ်။ အဲ့တာကြောင့် ကျွန်တော်တို့ လက်တွဲဖြစ်တာပါ။

အခုဆိုရင်၁၀၁၄က ဒုတိယကားပေါ့လေ နောက်ရိုက်မယ့်ကားကတော့ ဇာတ်မတင်ရသေးဘူး။ ဇာတ်တင်ပြီးရင် သူနဲ့ပဲ သူ့ရိုက်ရက်ကို ကျွန်တော်တို့ ယူထားပြီးပြီ အဲ့တော့ ဇာတ်တင်ပြီး ဇာတ်ကျပြီဆိုရင် ကျွန်တော်ရိုက်ဖို့ ဇွန်လမှာ စရိုက်မယ်။”လို့ ပြောသွားခဲ့ပါတယ်။

ပရိသတ်တွေ ပြောနေကြတဲ့ ဒေါင်းရဲ့ အကြည့်နဲ့ ပတ်သက်ပြီး ဦးကျော်သူက “သူ့ရဲ့ အကြည့်ကလည်း ဘယ်လိုပြောမလဲ ပရိသတ်တော်တော်များများ ကိုကျော်သူအငယ်စား ကျော်သူလေး ဘာညာအဲ့လို ပြောကြတယ်။ ဒါပေမဲ့ ကျော်သူက ကျော်သူပါ ဒေါင်းကဒေါင်းပါ။ ဒေါင်းအကြည့်ကလည်း ထူးခြားလို့ပေါ့ ကျွန်တော့်တုန်းကလည်း ကျော်သူ့အကြည့်တွေ ဘယ်လိုဘာဖြစ်တယ် ဒါမျိုးတွေ ဖြစ်ခဲ့တယ် ဒါပေမဲ့ သူက မျက်လုံးထဲနဲ့ စကားပြောနိုင်တယ်။ ပါးစပ်က ဖွင့်မပြောပေမယ့် မျက်လုံးက စကားပြောနိုင်တယ် အဲ့တာက သူ့ရဲ့ ထူးခြားချက်ပေါ့လေ။ အနုပညာသမားမှာ မျက်လုံးက အရေးကြီးတာကို မျက်လုံးအကြည့်က လူတစ်ယောက်ကို ဘယ်လောက် စွဲဆောင်နိုင်လဲ မျက်လုံးအကြည့်က လူတစ်ယောက်ကို ဘယ်လောက် ဒေါသထွက်စေလဲ ဘယ်လောက်ငိုစေလဲ ဒါမျက်လုံးက အရေးကြီးတယ် မျက်လုံးပါဝါ ကောင်းတဲ့အတွက် သူအောင်မြင်တာပေါ့။

အဓိက ပြောချင်တာကတော့ ဒေါင်းကိုအားပေးကြပါ။ ဒေါင်းကိုလည်း ဆုံးမပေးကြပါ။ အနုပညာသည်တစ်ယောက်က အောင်မြင်တယ်ဆိုရင် သူ့မှာ အန္တာရယ်က များလာပြီ။ ကျွန်တော်တို့ ဖြတ်သန်းလာတဲ့အပိုင်းကို ကျွန်တော်ပြောတာ ကျွန်တော်တို့ဆို အောင်မြင်လား အောင်မြင်တယ်ဆိုရင် အဖျက်က များလာပြီ နည်းပေါင်းစုံနဲ့ ဖျက်မယ်။ အဲ့အဖျက်တွေကိုကြံ့ကြံ့ခိုင်နိုင်ဖို့ အဲ့အဖျက်တွေကို မလုပ်နိုင်ဖို့ စိတ်မဝင်စားဖို့ ပရိသတ်မှာ တာဝန်အရှိဆုံးပါ ပရိသတ်ဖျက်တယ်ဆိုရင် အနုပညာသမားက ပျက်တာပဲ။ ထုတ်လုပ်သူဖျက်တယ်ဆိုရင်လည်း အနုပညာသမားက ပျက်တာပဲ။ ဒါရိုက်တာ ဖျက်တယ်ဆိုရင်လည်း အနုပညာသမားက ရေရှည်မခံဘူး။ အဓိကတော့ သူ့ကိုယ်သူ ထိန်းနိုင်ဖို့ အရေးကြီးတာပဲ ဖျက်ဖို့စောင့်နေတဲ့ လူတွေကတော့ အကုန်အဆင်သင့်ပဲ ရန်က ဝိုင်းနေပြီ ကိုယ့်ကိုကိုယ် ခံနိုင်ရည်ရှိအောင် ကြိုးစားရမယ်။ သူ့ဘာသာကြိုးစားတဲ့နေရာမှာ ကျွန်တော်တို့လို ရင်းနှီးတဲ့ တကယ့်သားအဖလို ဦးလေးနဲ့တူလို နေလာတဲ့ လူတွေက အနီးကပ်ကြတယ်။ ကျွန်တော့်အပိုင်းကတော့ အတတ်နိုင်ဆုံး သူ့အဖျက်တွေကို ကျွန်တော် ကာကွယ်ပေးမယ်။”လို့ ပြောသွားခဲ့ပါတယ်။