နေပြန်ကောင်းလာပြီး အချစ်သီချင်းအသစ်တွေ အများကြီး ဆိုပြတော့မယ့် ဆိုတေး

လွန်ခဲ့တဲ့ နှစ်တွေတုန်းက သီချင်းအေးအေးလေးတွေနဲ့ ပရိသတ်တွေ ရင်ထဲကို ရောက်အောင် သီဆိုနိုင်တဲ့ အဆိုတော်ဆိုတေး တယောက်ကတော့ ကားမတော်တဆမှု ဖြစ်ခဲ့ပြီး နှစ်အတော်ကြာ ဆေးကုသမှု ခံယူခဲ့ရတာကြောင့် အနုပညာလောကနဲ့ အဆက်အသွယ်ပြတ်သွားတာ ဖြစ်ပါတယ်။ လက်ရှိမှာတော့ ဆိုတေးအနေနဲ့ ကျန်းမာရေးကတော့ လုံးဝလူကောင်းတယောက်လို ပြန်ဖြစ်လာပြီး သူ့ပရိသတ်ကြီးအတွက်လည်း အချစ်သီချင်းတွေ အများကြီး ထွက်လာမယ်လို့ ပြောကြားသွား ခဲ့ပါတယ်။

အဆိုတော် ဆိုတေးကတော့ MC နဲ့ အင်တာဗျူးတွင် “ကျနော်ကျန်းမာရေးကောင်းနေပြီ။ ဆေးတော့ နည်းနည်းသောက်နေရသေးတယ်။ အားလုံးလည်း အဆင်ပြေနေပါပြီ။ ဆရာဝန်တွေရဲ့ ကျေးဇူးမိဘတွေကျေးဇူးကြောင့် အဆင်ပြေနေပါပြီ”

ဝိတ်ချဖို့ အစီအစဉ်ရှိသေးလားဆိုတဲ့ အပေါ်မှာ “ဝတုတ်ကြီး မဖြစ်သေးဘူးလေ။ ပြည့်နေတဲ့ အဆင့်ပဲ ရှိသေးတယ်။ ဆရာဝန်တွေ ပေးတဲ့ဆေးတွေသောက်တယ်။ အဲ့ဆေးတွေသောက်ပြီးရင် အရမ်းစားကောင်းတယ်။ အရမ်းလည်းအိပ်တယ်။ အရမ်းမိုက်တယ်။ ဆရာဝန်တွေ ကျနော့်မိဘတွေနဲ့ ပရိသတ်တွေကိုလည်း ကျနော် ကျေးဇူးတင်ပါတယ်”

သီချင်းသစ်တွေ လာဖို့ရှိလားဆိုတဲ့ အပေါ်မှာ “ကျနော် ပရိသတ်အတွက် အချစ်သီချင်းအသစ်တွေ အများကြီး ရေးပေးထားတယ်။ ဒါကြောင့်ထွက်လာရင် တခါတည်းလည်း VCD ဖြစ်ရင်ဖြစ်မယ်။ အတွဲခွေဖြစ်ရင်လည်း ဖြစ်မယ်။ ထုံးစံအတိုင်း ကျနော်ပုံစံလို အချစ်သီချင်းတွေပါပဲ။ ပရိသတ်ကို ချပြမှာပါ။ စောင့်မျှော်ပေးကြပါဦးဗျာ။ ပရိသတ်တွေကိုလည်း ကျနော်အရမ်းချစ်ပါတယ်။ သီချင်းတွေကတော့ သေချာပေါက်ထွက်လာမှာပါ”

သီချင်းတွေ ဖန်တီးတဲ့နေရာမှာ အရင်လိုပဲလား လိုအပ်ချက်တွေ ရှိလာပြီလားဆိုတဲ့ အပေါ်မှာတော့ “လိုအပ်ချက်ကတော့ ရှိလာပြီဗျာ။ ကျနော်တနေရာရာကို သွားရင် မျက်လုံးဝါးနေတယ်။ မတော်တဆဖြစ်ပြီး မျက်လုံးထိထားတော့ အမြင်တွေက သိပ်ပြီးမရှင်းမရှင်းဖြစ်တယ်။ အဲ့တော့ ကားမောင်းပေးမယ့်သူ မရှိရင် ကျနော်အဆင်မပြေဘူး။ စိတ်ပဲရှိတယ်။ လူကမရောက်ဘူး ဖြစ်နေတာ။ အဲ့ကြောင့် နှေးတာမြန်တာတွေ ဖြစ်လာပါတယ်။ နေမကောင်းပြီးတော့ ကျနော် အသံမလိုက်နိုင်တော့ဘူးလေ။ အသံက ဆွဲသလိုမျိုး ဖြစ်နေတယ်။ လည်ချောင်းထဲက ပိုက်ထည့်ထားတော့ အသံနာလာတယ်” ဟု ပြောကြားသွား ခဲ့ပါတယ်။